05 Abril 2018: Loke proposta projetu no ilas tékniku ba estrada husi Pasar Tono to’o fronteira Oesilo

05 Abril 2018: Loke proposta projetu no ilas tékniku ba estrada husi Pasar Tono to’o fronteira Oesilo

Sekretaria Rejional Finansas RAEOA nian, haktuir ninia servisu aprovizionamentu hala’o ohin, 5 Abril 2018, sorumutu publiku hodi loke proposta husi kompañia ne’ebé hetan prekualifikasaun hodi halo projetu no ilas tékniku ba estrada husi Pasar Tono to’o fronteira Oesilo.

Lala’ok ne’e permite atu dahir no kontinua estrada ne’ebé hari’i tiha ona husi Samoro to’o Pasar Tono no moos hatan ba kompromisu ne’ebé RAEOA ZEESM TL hato’o ba komunidade iha Suco Cunha, Naimeco no Bobometo tuir ninia Planu Diretor Ordenamentu Território no implementa Governu Sentral nian orientasaun tuir Planu Estratéjiku Dezenvolvimentu ne’ebé VI no VII Governu hakru’uk ba.

Dalan ne’e nia kondisaun ohin loron mak kumprimentu 17 km, ponte (klaletek) rua iha ribeira Abanal no Kinloki, ne’ebé suli mutuk ba Rio Tono. Hakat dauluk husi estrada existente mak kilometru hitu (7) iha rai tetuk no hakat daruak ho kilometru 10 iha foho no rai sadere ho fatuk, rai mamar no potensial ba abatimentu no rai halai, nune’e moos dalan ne’e tenke hetan estudu klean kona-ba rai ni kompozisaun no téknika ne’ebé di’ak liu hodi redus kustu no aumenta protesaun ba estrada no ema ne’ebé utiliza estrada.

Dalan ne’e sei favorese komunidade Oe-Cusse tomak ne’ebé hakat ba mai Indonésia tuir fronteira Oesilo, liu-liu Suco Cunha, Naimeco, Bobometo ne’ebé sei hetan asesu fasil liu ba fronteira no moos ba infraestrutura rejional hanesan Portu, Aeroportu, Hospital ne’ebé sei lokalizasaun iha sidade Pante Macassar.

Dalan ne’ebé sei hadia mos sei fo benefisiu direto ba knua rihun ne’ebé lokalizadu iha povoamentu liu rua-nulu ne’ebé sei fasilita Estadu atu lori ba be’e moos no servisu saudi hodi kobre komunidade hirak ne’e iha zonas remotas.

Haktuir instrusaun ne’ebé prepara husi Gabinete Técnico de Acompanhamento da RAEOA ZEESM-TL no Direção de Infraestruturas, dalan ne’e sei iha faixa rua (hanesan daudaun hela), kada ida ho metru tolu no metru ida nia sor-sorin, tuir kondisaun lokal (ambiental no sosial) no moos kestaun segurança rodoviárias hanesan visibilidade.

Lala’ok aprovizisionamentu ne’e sei tuir lala’ok no lejislasaun nasional no moos kritériu seluk ne’ebé hametin kualidade tuir esperiénsia husi lala’ok di’ak iha aprovizionamentu ba estradas ne’ebé atu hanesan via Pasar Tono-Oesilo.

Proposta hirak ne’e liu tiha ohin sei hetan avaliasaun téknika no financeira husi ekipa separadu ne’ebé sei halibur sira nia notas iha relatóriu avaliasaun konjuntu hodi fasilita xefia RAEOA-ZEESM TL atu hola desizaun kona-ba prosesu ne’e.