23 Abril 2018: Grupu Turizmu Peregrinasaun dahuluk koñese fatin sagradu sira iha Oé-Cusse

23 Abril 2018: Grupu Turizmu Peregrinasaun dahuluk koñese fatin sagradu sira iha Oé-Cusse

Ema nain tolunolu resin lima ne’ebé halo parte grupu turizmu peregrinasaun dahuluk fila-fali ba Díli ho kontenti, hafoin halo vizita ba fatin atrasaun relijioza prinsipál sira iha rejiaun Oé-Cusse.

 

Grupu turizmu relijiozu dahuluk ne’ebé to’o iha Sesta-feira liu-ba, akompaña husi Ministru Turizmu Timor-Leste nian, S.E. Dr. Manuel Florêncio Vong, fila-fali ba Díli ho impresaun ne’ebé diak kona-ba Oé-Cusse. Hafoin hala’o atividade intensa loron rua iha rejiaun ho vizita ba fatin relijiozu prinsipál sira, grupu-pilotu dahuluk ne’ebé konstitui husi ema nain tolunolu resin lima senti satisfeitu ho viajen ka tour ne’ebé organiza husi Ministériu Turizmu-RDTL no apoia husi Sekretaria Rejionál ba Turizmu Komunitáriu iha RAEOA no ZEESM TL.

Turizmu peregrinasaun hanesan modalidade antigu turizmu nian iha mundu no hanesan mos instrumentu ne’ebé diak ba dezenvolvimentu lokál. Tuir fiar relijioza, wainhira turista sira vizita fatin lulik ka sagradu, sira sei deskobre ka koñese sira nia kultura no valór.

Iha Sesta-feira, tour ida ne’e hahu ho vizita ba iha gruta Santo António Polsiba no Igreja Santo António Nispeno. Tuir mai, iha loron sábadu grupu ida ne’e halo viajen ba Citrana hodi vizita Kapela Relíkia ne’ebé hanesan mos fatin atrasaun relijioza prinsipál ida. Sira mos koñese istória Lifau nian ne’ebé konta husi Sekretária Rejionál ba Turizmu Komunitáriu, Sra. Inácia Teixeira, no vizita Fatu-Suba ne’ebé lokaliza iha laletek Pante Makassar nian. Ikus liu, iha loron Domingu grupu ne’e fila-fali bá Díli.

Sra. Inácia Teixeira rekoñese katak vizita dahuluk grupu turista relijiozu nasionál ne’e sai hanesan biban ida atu hatudu ba Timor-Leste tomak fatin potensiál turístiku sira iha Oé-Cusse no agradese ba Ministru Turizmu Timor-Leste ba ninia konfiánsa no apoiu hodi promove turizmu relijiozu iha Oé-Cusse ne’ebé sai hanesan “abut” ba Katolisizmu iha Timor-Leste.

Tour leader Dulce Mendonça hateten hodi realsa momentu diak sira ne’ebé turista sira hala’o iha Oé-Cusse, maibe, lamenta tebes ho durasaun tempu ne’ebé badak tebes ba  sira atu deskobre ka koñese fatin atrasaun sira. Mendonça mos iha esperansa pozitiva kona-ba futuru turizmu relijiozu iha Oé-Cusse: “Hau hanoin projeitu ida ne’e sei lori impaktu pozitivu liu-liu iha infraestrutura no ekonomia populasaun lokál nian”.