Diseminasaun Polítika Nasionál Turizmu ba Timor-Leste iha Oé-Cusse

Diseminasaun Polítika Nasionál Turizmu ba Timor-Leste iha Oé-Cusse

Ho naran “Haburas Turizmu to’o tinan 2030. Hametin Identidade Nasionál”, polítika ida ne’e hatúr enkuadramentu ida ne’ebé konsidera turizmu hanesan sentru ba espansaun sósiu-ekonómiku nasionál

 

Iha segunda-feira loron 28 fulan Maiu, ekipa husi Ministériu Turizmu RDTL ne’ebé lidera husi Diretór Jerál ba Turizmu, Sr. José Filipe Dias Quintas, realiza workshop ida iha Pante Makassar ho objetivu atu sosializa Polítika Nasionál Turizmu ba Timor-Leste.

Semináriu ida ne’e organiza ho apoiu husi Sekretaria Rejionál ba Turizmu Komunitáriu iha RAEOA-ZEESM TL no koalia liu kona-bá parte prinsipál sira husi polítika nasionál refere ne’ebé lansa tiha ona iha tinan kotuk.

Ho naran “Growing tourism to 2030. Enhancing a National Identity ka Hamoris Turizmu to’o tinan 2030. Hametin Identidade Nasionál”, polítika ida ne’e uza “5P’s” (Purpose ka Objetivu, Prosperity ka Prosperidade, Protection ka Protesaun, Partnership ka Parseria no People ka Povu) atu introduz dalan ne’ebé lao tuir hodi bele atinji dezenvolvimentu setór turizmu ba to’o tinan 2030.

Hanesan hakerek iha dokumentu ne’ebé mak fahe ba partisipante sira, “Polítika Nasionál ba Timor-Leste hatur enkuadramentu ida ne’ebé konsidera turizmu hanesan sentru ba espansaun sósiu-ekonómiku nasionál no tane stakeholder sira hotu atu koordena, kolabora no servisu hamutuk hodi bele hetan rendimentu, hamosu kampu traballu no hamenus kiak”. Ho nune’e, partisipa iha treinamentu ida ne’e reprezentante sira husi setór privadu iha Oé-Cusse, nune’e mos funsionáriu sira governu nian iha RAEOA-ZEESM TL.