MORAS MALARIA IHA OECUSSE HAHU’U MENUS

MORAS MALARIA IHA OECUSSE HAHU’U MENUS

Hodi hatan ba politika Timor Leste “livre ona husi Malaria” iha tinan 2021, Serbisu Saude  RAEOA liuhusi ninia Adjuntu Saude RAEOA,Facundo Lafo ho Asesor Saude e Investementu,Francelino Freitas hamutuk ho Equipa husi Nasional lideradu husi  Xefe Programa Malaria, Maria Mota no espesialista rai liur hanesan: , espesialista Vijilânsia  Resposta Rápida husi Universdade Medicina Colombo,  Sri Lanka Profesor Rajitha, , espesialista ba Diagnostika no Tratamentu Jestaun konaba Malaria, Dra Srivicha  inklui delegadus husi Universidade Mahidol , Tailandia, ACT Malaria Network Philipina no , espesialsta konaba Apoiu Jestaun Rekursu Humanu husi India halo  avaliasaun no monitorizasaun konaba impelementasaun programa malaria iha RAEOA. Programa ne’ebe halao iha Sakato, Oecusse loron 12 Fevereiru 2020 nu’udar programa vijilansia epidemilojia ho asaun rapidu wainhira mosu sintomas ruma husi moras malaria.

Dadus  estatistika husi  Serbisu Saude Rejional konaba moras malaria iha Oecusse  tinan hirak liu ba hatudu katak kazu malaria iha RAEOA  hahu’u elemina   kompara ho tinan hirak liu ba. Iha tinan  2016 kazu ne’ebe relata hamutuk  88. Husi total numeru ne’e,  78 hetan transmisaun husi rai laran no kazu 10 importa husi nasaun vijinhu Indonezia hanesan Atambua, Kupaun, Kefa no Naktuka. Iha  tinan 2017, iha kazu  10 ne’ebe hetan transmisaun husi rai laran. Tinan 2018 iha kazu  4 ne’ebe hetan transmisaun husi rai liur no iha  tinan 2019 iha kazu 2 ne’ebe hetan mos transmisaun  husi rai liur.

Esforsu tomak hodi elemina moras malaria iha Oecusse, Serbisu Saude  RAEOA  halao liuhusi programa  fahe mosquiteiru  ba komunidade iha postu hat hanesan Nítibe, Oe-Silu, Pásabe no Pante-Makasár  inklui halo pulverizasaun ba komunidade nia uma ne’ebe voluntariamente halao husi pesoal saude RAEOA. Serbisu Saude Rejional RAEAO mos kuntinua  asegura tratamentu ne’ebe halao husi pesoal saude sira hanesan fahe aimoruk no halo nafatin monitorizasaun ba moras malaria.

Hodi mellora prosidementus  elemina moras malaria iha teritoriu laran, peritus rai liur sira ne’ebe oras ne’e halao hela sira nia observasaun iha Timor Leste sei aprezenta dadus hirak ne’e ba Ministeriu Saude no parseiru sira iha loron 21 Fevereiru 2020 iha Timor Plaza.  Sorumutu ne’e sei   fornese  sujestaun no rekomendasaun ba Ministeriu Saude hodi hamosu plataforma foun hodi kombate moras malaria tuir politika Governu Timor Leste.

Media RAEOA – ZEESMTL