Oé-Cusse hasoru HIV/SIDA

Oé-Cusse hasoru HIV/SIDA

“Oé-Cusse diferenti liu duke tinan rua liu ba”, dehan Daniel Marçal, presidente Comissão Nacional de Combate ao HIV/SIDA Timor-Leste, ne’ebe hamutuk ho ninia ekipa iha loron lima nia laran, mai iha Oé-Cusse hodi halo enkontru ho objetivu atu informa no halo sensibilizasaun ba sidadaun sira, liu-liu ba foin-sae sira, kona ba problema ida ne’e. “Oé-Cusse haburas lalais liu, ho infraestrutura importantes tebes hanesan estradas no ponti sira, aeroportu no komunikasaun, maibé hamutuk ho dezenvolvimentu mos hetan dezafiu, aspetus negativus ke hamutuk ita tenke preve, hare di-diak no halo prevensaun”, temi tan Secretário Regional Adjunto do Presidente da Autoridade da RAEOA-ZEESM TL para assuntos de Saúde, Arsenio Bano. “Ita la bele dehan deit katak ´aspetu dezenvolvimentu ne’e pozitivu, tama, ida ne’e negativu, la bele tama´…  ho dezenvolvimentu aumenta sirkulasaun osan, sasan no ema, nune’e aumenta perigu relasiona ba moras hanesan SIDA, tráfiku umanu, droga no krime organizadu. Ita hatene ida ne’e, nune’e ita bele defini estratéjia no polítika atu hamenus impaktu negativu ba dezenvolvimentu”, klarifika. 

Estratéjia RAEOA-ZEESM TL nia, ho apoiu hosi Comissão Daniel Marçal nia, atu aumenta divulgasaun kona ba transmisaun moras HIV/SIDA – liu-liu, liu hosi relasaun seksual séin protesaun, tatuajem ka uzu droga (sona) – no atu promove “kontrola a’an no respeitu, ba a’an rasik no ba ema seluk, liu-liu ba maluk ne’ebe hadomi ka namora”, esplika Daniel Marçal. Fo’o sai konsellu kona ba seksu ho responsabilidade séin promiskuidadi, mo’os promove edukasaun sívika iha asuntu relasionamentu no sentimentu, importanti tebes, “maibé, importanti liu informa kona ba Doenças Sexualmente Transmissíveis (DST), to’o áreas remotas, atu ema bele halo desizaun ho informasaun”. Nune’e Comissão halo planu hodi mai fali iha Oé-Cusse hodi ba área rural no remota.

Iha loron 5 nia laran, aléin de semináriu, Comissão mos halao ona formasaun espesífika ba pesoal Saúde nia no mo´os ba ema ne´ebe atendi públiku atu profisional sira ne’e bele sai ativu atu promove boas práticas hodi hasoru diskriminasaun, informasaun lo-lós no haruka ema hodi hetan tratamentu.

Semináriu ida ne’e hetan partisipasaun hosi foin-sae sira, estudante pré-sekundáriu no sekundáriu, F-FDTL no PNTL, funsionáriu públiku, xefe suku, líderes lokais no populasaun sira.