Ema Oé-Cusse

Ema Oé-Cusse

“Oé-Cusse sei… hatudu hela nivel konfiansa no koezaun sosiál ne’ebé bele serve nu’udar baze atu hatán ba problema sira-seluk.”

Ema Oé-Cusse sira iha orientasaun internasionál hori uluk kedas. Ho fiar katak iha vizita liuhosi ema fila-liman hosi Xina iha sékulu 13, nia sai fatin ba kapitál ulukliu Portugál nian iha Rai-Kotun ne’e hosi tinan 1515 to’o 1775. Hafoin tuir tinan 1775 nia nafatin hela portu independente importante ida, iha ne’ebé ema fila-liman hosi Olanda, Inglaterra, Índia, Portugál, Indonézia no Xina serbisu hodi hasai ai-kameli no hola kafé. Ohin-loron ami-nia ró-pasajeiru, estrada no aeroportu foun sei kontinua tradisaun ida-ne’e.

Dalen sira

Iha dalen balu ko’alia iha Oé-Cusse depende ba fatin no domíniu. Ema maioria ko’alia dalen lokál, Lais Meto (Baikenu). Ema barak ko’alia Tetun-Prasa maibé sira uza de’it ho ema seluk ne’ebé la hatene ko’alia Lais Meto ne’e. Hamutuk ho dalen rua ne’e, ema maioria hatene ko’alia lian internasionál rua Portugués no Indonézia, no lian-Inglés hanesan lian foin tama. Dalaruma reuniaun negósiu nian bele halo iha lian-Inglés atu simu ema rai-li’ur, maibé ema uitoan de’it ko’alia lian ida-ne’e iha Pante Makassar nia li’ur.

Área Lulik sira

Ema Oé-Cusse sira iha fiar lulik maka’as, no sira haree sira-nia bei’ala no rai hanesan membru komunidade ne’ebé importante no sempre hamutuk ho sira. Hanoin katak fatin ida ka lisan ida mak lulik mak buat ida baibain iha Oé-Cusse. Iha fatin lulik barak, ne’ebé hanesan rate-fatin, fatin ne’ebé labele halo to’os ka natar, bee-tudak ka fatin sira seluk atu halo lisan. Atu hanesan ho igreja ka templu sira, fatin ida-ida iha nia signifikasaun no dalan rasik oinsá atu hatudu respeitu. Buat hotu ne’e bele buat hanesan baibain de’it ba rai-na’in sira maske ema hosi li’ur la hatene. Ambientalista sira nota katak iha kazu barak fatin lulik no tabu hirak-ne’e iha funsaun atu prezerva rekursu naturál esensiál sira hanesan bee-matan no ai-laran rejenerativu ka horik-fatin. Ami-nia rezerva florestál mak fatin ida hanesan ne’e.

Demográfiku no Diferensa sira

Iha liu ema timoroan na’in 70,000 ne’ebé hela iha Oé-Cusse, ho maioria, ema na’in 12,000 hela iha Pante Makassar. Iha mós sosiedade expatriadu vibrante iha ne’ebá ho liu ema rai-li’ur na’in 2,000 ne’ebé hela iha área tomak ne’e, inklui ema Portugál, Indonézia, Xina no Irlandia. Iha tradisaun oioin atu buka-hatene iha parte oioin iha Oé-Cusse nia laran, tais, tabu ai-han no forma uma-lisan ne’ebé lahanesan entre fatin foho no tasi-sorin.

Sosiedade

Hanesan ema hotu-hotu ne’ebé vizita haree kedas Oé-Cusse iha ambiente seguru no estatístika sira suporta ida-ne’e ho taxa krime menus tebes. Konfiansa sosiál mak harii hela hosi fundasaun família kle’an no protesaun ne’e mós fó ba bainaka sira. Iha relatóriu foin lalais ne’e 96% hosi ema Oé-Cusse sente prontu atu fó fiar ba sira-nia viziñu atu lori osan ba membru família sira iha Dili bainhira hasoru emerjénsia ruma. Eventu komunál sira hanesan festivál, liturjia, Katólika no tuir lisan, hetan partisipasaun hosi ema barak loos. Parseiru internasionál sira nota katak bainhira husu esforsu komunál ba projetu konstrusaun sira iha apoiu maka’as liuhosi komunidade sira, no parte estrada ladi’ak hadi’a lalais bainhira presiza.

La’ós ami de’it ne’ebé apresia kultura no alkansamentu ema Oé-Cusse sira-nian. Iha tinan 2016 Oé-Cusse nia ekipa múzika no tais sira hetan fatin dahuluk no daruak respetivamente iha Timor-Leste nia festivál kulturál.