Prezidente Autoridade RAEOA-ZEESM Timor Leste, Jose Luís Guterres “ Hau mai atu servi Povu Oecusse “

Prezidente Autoridade RAEOA-ZEESM Timor Leste, Jose Luís Guterres “ Hau mai atu servi Povu Oecusse “

Hodi fortifika prosesu dezenvolvimentu iha Oecusse, Prezidente Autoridade RAEOA-ZEESM sei loke diskusaun hodi asegura aplikasoens  transparansia ba ejekusaun servisu no gastus orsamentu ho entidades Oecusse tomak hanesan Autoridade lokais no lia nain sira hodi bele hamosu kumprensaun komum hodi tau matan hamutuk ba prosesu   dezenvolvimentu RAEOA  liuhusi partisipasaun ativu Povu Enclave, Oecusse.

Povu Oecusse iha direitu atu hatene konaba utilizasaun orsamentu ho ninia benefisiu tomak liuhusi realizasaun inkontru ho autoridade no Xefe suku sira. Tanba prosesu dezenvolvimentu ne’ebe la involve povu, defisil atu lao ba oin” hateten  Prezidente Autoridade RAEOA-ZEESM Timor Leste, Jose Luís Guterres iha sorumutu konaba  “Seguransa Sosial no Nia Benefisiu”  ho Xefe Suku, Xefe Aldeias no funsionariu RAEOA iha Palaban, Oecusse loron 13 Fevereiru 2020.

PA RAEOA – ZEESM,  kuntinua enkoraza ba entidades hotu iha Oecusse atu koopera ho Autoridade atual hodi kontribui nafatin hanoin kritikus  hadia buat ne’ebe la diak ba interese povu Oecusse. Prezidente Autoridade RAEOA-ZEESM Timor Leste komprometidu hodi kuntinua respeita nafatin ba buat ne’ebe autoridade anterior halo tiha ona hodi hadia hikas buat ne’ebe la diak ba intereses povu Oecusse nian.

 “Ho respitu tomak, hau mai servisu ho fuan tomak.  Se wainhira imi hare iha buat ruma ladiak, husu atu bele iha kritika hodi hadia” konfirma Prezidente Autoridade RAEOA-ZEESM.

Kona ba funsionarius  kontratadu hirak ne’ebe servisu husi tempu Autoridade Anterior nian, Prezidente Autoridade RAEOA-ZEESM halo ona adisaun hodi  estende  kontratu  funsionarius  kontratadu  to fulan 6. Depois fulan 6, Autoridade RAEOA hamutuk ho Komisaun Funsaun Públika (KFP)  sei  loke konkursu publiku hodi fo mos opurtunidade ba entidades hotu hodi bele konkore ba vagas hirak ne’e. Kumprimisu ne’e hodi bele defini profesionalismu kada sidadaun liu liu Oecusse oan hodi partisipa ativu iha prosesu dezenvolvimentu hodi la hare ba kartaun partidu A no B.

“Hau sei lahasai no hatama ema tanba kartaun. Ida ne’e hau nia kumprimisu ba povu Oecusse. Tanba hau mai atu servi ho fuan tomak”

Prezidente Autoridade RAEOA-ZEESM,  sei hato’o mos pedidu no hare hikas fali tipu kontratu ba projetu hotu ne’ebe mak halao  iha Oecusse,  hodi hare opurtunidade ba Oecusse oan sira nia  involvimentu  iha obra hirak ne’e.

“Ami sei hare kontratu projetu estadu nian. Tanba osan barak ba tiha rai liur no la hela iha Oecusse”.Prezidente Autoridade RAEOA-ZEESM Timor Leste, Jose Luís Guterres.

Media GPA RAEOA – ZEESMTL