RAEOA -ZEESM-TL no UNDP asina akordu foun apoia Inovasaun, Agrikultura, Edukasaun no Turizmu iha Oé-Cusse

RAEOA -ZEESM-TL no UNDP asina akordu foun apoia Inovasaun, Agrikultura, Edukasaun no Turizmu iha Oé-Cusse

Prezidente Autoridade Rejiaun Administrativa Espesiál Oé-Cusse Ambeno (RAEOA – ZEESM – TL), Exelénsia Dr Mari Alkatiri, hasoru malu iha Kuarta dadeer, Janeiru 23, 2019, hamutuk ho Reprezentativu rezidente PNUD iha Timor-Leste, Mr Claudio Providas, atu esplika no asina ofisiozamente programa servisu ba tinan tolu oinmai (Janeiru 2019 – Dezembru 2021). Durante reuniaun ne’e, ekipa PNUD foti oportunidade atu rekolla servisu ne’ebé, iha parseria ho RAEOA – ZEESM TL, mak dezenvolve tiha ona iha área sira hanesan Edukasaun, Saúde, Empreendedorizmu, Agrikultura, Turizmu no Aprovizionamentu. Nune’e, ho orsamentu maizumenus USD 1 millaun, PNUD aloka rekursu umanu espesializadu balu ba Rejiaun ne’e, hamutuk ho apoiu ba aprovizionamentu, ne’ebé loke dalan ba ekonomias liu 20%, ba veíkulu no ekipamentu komputadór ba Governu Rejionál.

Iha setór Agrikultura, teknolojia produsaun hare ne’ebé foin introdús aumenta produsaun lokál 136% hosi tonelada 3 kada ha to’o tonelada 8 kada ha). Projetu pilotu ne’e sei replika durante tinan 2019 nia laran iha área rai adisionál 14.000 ha, ho partisipasaun hosi produtór balu no sira-nia komunidade respetivu. Iha tempu hanesan, estudu avaliasaun kona-ba kadeia valór mak dezenvolve tiha hodi determina kultura agríkola lukrativa, no iha variedade hirak-ne’e nia laran, kultura agríkola sira ne’ebé tenke simu apoiu ba investimentu, bazeia ba sira-nia potensiál ba jerasaun renda ba família sira-ne’ebé moris hosi agrikultura subsisténsia. Ho utilizasaun teknolojia avansadu ne’e, natar-na’in sira iha Oé-Cusse sei iha asesu ba fini mellorada jenetikamente no formasaun atu aumenta produtividade no kompetitividade, hamutuk ho asaun pedagójiku hodi aumenta literasia finanseira no kapasidade jestaun, ba individúu no kooperativa sira.

Iha setór Turizmu, aleinde halo mapeamentu kona-ba atrasaun lokál sira, projetu ne’e dezenvolve ona broxura sira ho informasaun relevante ba turista no tau sinalizasaun iha área selesionada sira. Ho objetivu atu dezenvolve Ekonomia Sosiál, matadalan turista espesífiku ba komunidade ida-idak sei simu formasaun. Liután, Inkubadora Empreza Oé-Cusse fó suporte ho apoiu finanseiru no tékniku. Kolókiu foun ba inovasaun mak planeadu ba Fevereiru 2019. Inkubadora ne’e sei mós tama ba faze daruak, ho formasaun tan, suporte tan no enfaze forte liu ba inovasaun no emprezáriu joven sira. Atu hametin susesu kontinua hosi inisiativa hirak-ne’e, ofisiál PNUD sira enfazia servisu importante ne’ebé halo hela liuhosi Rejiaun no lidera liuhosi Prezidente Autoridade, Dr Mari Alkatiri, hamutuk ho xefe suku sira.

Durante tinan tolu tuirmai, parseria entre RAEOA – ZEESM TL no PNUD iha intensaun atu kontribui ba aselerasaun kresimentu iha ekonomia lokál. Prezidente Autoridade hato’o sumáriu katak, “ami hakarak liu fali buat seluk, atu apoia ema kiak liu hotu hosi Oé-Cusse atu husik moris mukit ba kotuk liuhosi fornese ferramenta sira no apoiu”.

RAEOA no PNUD asina projetu foun hanaran “Utiliza TIK atu Hadi’ak Edukasaun no Abilidade sira iha Timor-Leste” ne’ebé iha valór USD 881.193,20. Projetu ne’e iha objetivu atu hadi’ak edukasaun primária no sekundária liuhosi fornese labarik no joven sira iha rejiaun Oé-Cusse ho abilidade no koñesimentu TIK nian hodi prepara sira atu hatán di’ak liu ba dezafiu no oportunidade ekonomia nian.

Reuniaun ne’e mós asiste hela liuhosi Sekretária Rejionál sira Sr. Arsenio Bano, Ms Leónia Monteiro no Ms Inácia Teixeira no pontu fokál RAEOA nian ba Projetu, Sr. Rui Pinto.