Resumu Espropriasaun Rai Fulolo ba Rezidensia Autoridade

Resumu Espropriasaun Rai Fulolo ba Rezidensia Autoridade

Download

Komunikadu Imprensa

Resumu Espropriasaun Rai Fulolo ba Rezidensia Autoridade

            Hanesan públiku hatene kestaun titulariedade ba rai (nain ba rai) kontinua sai hanesan asuntu importante ne’ebé reker estudu no analise klean husi ita nia Estado. Kestaun konflitu relasiona ba rai, desde Governu dahuluk sai asuntu ne’ebé importante ba diskusaun iha estrutura Estadu nian no moos nahe biti organizasaun sosiedade sivil, akadémiku no ajénsia internasional sira. Kestaun ne’e hahú aborda desde Governu dahuluk to’o Governu oras daudaun. Durante tempu naruk ne’e iha konseitu balun ne’ebé evolui no oras daudaun aplika tuir Sistema Nasional Kadastru nian (SNC) ne’ebé kadavés sai hun hodi haklaken lala’ok organizasaun Governu nian iha prosedimentu negosiasaun, mediasaun no restaurasaun ba danu husi deklarante ba rai.

 

Liu hosi aproximasaun direta DRTP, Liu Rai Costa no Naijuf (Uma Lisan) Suku Costa nian, hanesan Goveas, Pareiras, Kunsensas, Corbafos no Costa, sira maka reprezenta nu’udar Rai Na’in iha Suku Costa no sira deklara katak Rai Fulolo iha tempu Portugues no Indonesia sai hanesan Area Protezida Kulturál (fatin ne’e mamuk no laiha ema ida okupa). Sr. Antonio Martins Corbafo hanesan Xefi Suku Costa Tempu Indonesia nian deklara katak fatin Fulolo ho Oe-Upu sai hanesan fatin hodi realiza programa Reboisasi (Area Verde) no realidade hatudu katak iha Ai Teka Lokál ne’ebé maka sei iha to’o agora. Naijuf Suku Bobometo no Naijuf Batista Tafin ho Naijuf Suku Usi Tasae Liberatu Punef mos rekonhese katak rai Fulolo ne’e Los duni nu’udar área Protezida Kultural hosi Kosta no laiha ema okupa.

 

Iha tempu Indonesia Funsionariu Na’in rua hanesan: Manuel Tolan no Sipriano Daos maka halo levantamentu kadastral hodi hetan Direitu ba Rai no hetan Sertifikadu Indonesia Hak Milik (HM) ne’ebé baliza ho rai estadu.

Deklarasaun uma lisan ne’ebé temi iha leten kestiona katak iha tempu Portugues to’o Indonesia Rai Fulolo ne’e hanesan fatin deskansa nian kuandu lao ain tanan no mos iha tempu kalan ita labele liu hosi fatin ne’e (Fulolo), kuandu hakarak liu tenki liu hosi Oetulu sai fali ba Sikone no liu ba Padiae. Okupante na’in 6 (neen) maka dadaun halo uma iha Fulolo foin maka okupa iha 2001 to’o 2004, iha tempu UNTAET programa hosi WFP iha tinan 2000 haruka komunidade halo kantaneru ho medida 3m x 6m hodi kuda foremunggu ba ema 70 (hitu nulu) ne’e maka DRTP konsege halo levantamentu dadus no hetan duni ema sira ne’ebé momentu ne’eba halo kantaneru no to ikus ema na’in 70 (hitu nulu) ne’e maka halo deklarasaun ba DRTP katak sira maka na’in ba rai iha Fulolo. Programa ida ne’e hatutan deit Suku Costa iha tempu Indonesia LKMD.

 

Hare ba realidade ne’ebé iha enkontru komunitario ne’ebé durante ne’e DRTP hala’o iha fatin refere ema nai’in 70 (hitu nulu) ne’ebé halo deklarasaun falsu hanesan na’in ba rai la duun partisipa ho máximu no mos laiha konsiderasaun ba Lider Komunitario hanesan Xefi Suku, Xefi Aldeia no Ékipa tékniku. Enkontru ne’ebé DRTP realiza kuaze dala 8 (ualu), afetadu Sr. Domingos Neno Abi, koalia diretamente ho Xefi Suku Kosta Aleixo Abi katak nia hein Governu foun maka bele sobu ninia uma, hare ba realidade ne’ebé iha DRTP hato’o pareser ba SROTC konaba vinggansa ne’ebé sira sempre hato’o ba ekipa tékniku no ikus SROTC hatun despaxu no ordem servisu hodi muda afetadu na’in 6 (neen) ba uma foun ne’ebé Governu RAEOA ZEESM-TL prepara tiha ona. Tuir mai DRTP prontu atu fasilita uma Lisan hirak ne’ebé temi iha leten hodi bele hasoru diretamente.

 

Oras daudaun, Rejiaun Administrativa Espesial Oe-Cusse Ambeno hakru’uk ba lei hotu ne’ebé vigora iha Timor-Leste no tuir ninia kompeténsia, nia kna’ar no nia kbi’it buka dalan hodi minimiza konflitu relasiona ho rai, liu-liu konflitu entre deklarante ba rai (ne’ebé hato’o ba Governu tuir SNC katak rai ne’ebé nia okupa mak ninian) no projetu ne’ebé hetan finansiamentu ka/no kontrapartida seluk husi Estado.

 

Iha kazu ne’ebé oras daudaun públiku balun kestiona, kazu ne’ebé relasiona ho sidadaun ne’ebé hela iha zona Fulolo, ne’ebé hala’o urbanizasaun ki’ik, dalan no lutu. Rai ne’e, tuir rejistu husi Distrito Oe-Cusse (uluk sei distrito hela) pretense ba Estado. Iha tinan 2004 ho tulun husi ajuda internasional komunidade local loke dalan no servisu ho To’os Na’in ne’ebé hala’o agrikultura destrutiva (sunu rai arbiru) hodi halo agrikultura ho sukalku (terracing) iha Fulolo nu’udar “demonstration plot” (dem pot). Iha momentu ne’eba sidadaun sira ne’ebé hala’o agrikultura no iha to’os iha Fulolo hanesan bainbain iha Timor-Leste hari’i sira nia uma to’os (habitasaun prekária ne’ebé utiliza durante tempu halo to’os).

 

Bainhira RAEOA ZEESM TL estabelese nu’udar liman-ain ba Estado iha Oe-Cusse Ambeno,  RAEOA rekoñese duni katak ema hahú utiliza rai Estado iha Fulolo nu’udar rai agrikula iha 2004, no bainhira RAEOA ZEESM TL hahú planu atu hari’i arruamentu no urbanizasaun ki’ik iha Fulolo RAEOA ZEESM TL  tuir ninia Sekretaria Rejional Ordenamentu Territóriu no Kadastru (ne’ebé servisu ho kordenasaun ho Sistema Nasional Kadastru) hahú hamutuk ho lideransa lokal, identifika ema ne’ebé deklara rai Estadu nu’udar ninia no koko atu hetan solusaun ne’ebé bele fó insentivu ba ema ne’ebé okupa rai Estadu atu sai no hela iha rai ne’ebé Estadu tuir nia kbi’it bele kria kondisaun digna ba sidadaun atu hela ba no moos oferese seguransa uitoan do pontu de vista de future akizisaun ba titulariedade (hodi sidadaun bele sai iha tempu besik, karik lei permite, sai nain ba rai iha fatin ne’ebé RAEOA ZEESM TL hari’i um ba deklarante atu hela).

 

Prosesu kriasaun pakote insensitivus, negosiasaun sai dalan ne’ebé RAEOA ZEESM TL hetan ne’ebé tuir analise ba lei dalan ne’ebé justu no ne’ebé fo tulun ba sidadaun no familia ne’ebé okupa rai Estadu atu se’es a’an husi prekariedade moris no hetan seguransa no kondisaun digna.

 

Importante realsa katak sidadaun ne’ebé iha Númeru Úniku Identifikador Parsela (NUIP) ka Buletim ne’ebé fahe husi projetu “Ita nian Rai” dokumentu hirak ne’e la signifika katak sidadaun ne’ebé kaer dokumentu ne’e iha titulariedade ba rai (sai nain ba rai), dokumentu ne’e hato’o deit ba Estado katak iha ema ne’ebé deklara (hato’o ba Governu) rai pedasuk balun nu’udar rai ne’ebé nia uza daudaun ka nia familia uluk uza. Prosesu atribui titulariedade prosesu ne’ebé sei naruk no lidera husi Governu Sentral, RAEOA ZEESM TL koko tuir nia kna’ar, kbi’it no lei ne’ebé iha hodi hadia kondisaun ba populasaun nia moris no hametin sentimentu seguransa ba rai tuir lala’ok simples fundamentadu ho lei ne’ebé iha.

 

Remata.

 

 

Gabinete do Presidente da Autoridade da

Região Administrativa Especial de Oé-Cusse Ambeno e das

Zonas Especiais de Economia Social de Mercado de Timor-Leste