Agrikultura, Floresta & Peskas

Agrikultura, Floresta & Peskas

Foku imediatu ZEESM TL nian mak atu hasa’e produsaun nutrisionál hosi agrikultura no peskas enkuandu dezenvolve rendimentu sustentavel hosi pekuária no floresta ne’ebé bele haboot hodi sai komérsiu internasionál.

Ohin-loron agrikultura fornese rendimentu no traballu prinsipál ba maioria feto no mane sira iha Oé-Cusse. Relatóriu ida liuhosi Banku Mundiál hatudu katak 78% hosi populasaun halo parte iha agrikultura no 91% hosi populasaun sira mak na’in ka aluga rai ba atividade agrikultura. Ida-ne’e mak aas barak liután kompara ho fatin sira-seluk iha Timor-Leste, iha-ne’ebé 16% de’it mak halo hanesan.

Investimentu ba An Rasik

Matenek-na’in loloos hodi fornese hahán ba populasaun Oé-Cusse mak to’os no natar-na’in sira iha Oé-Cusse. Rona sira-nia hanoin iha video ida ne’e. Atu fó dalan ba sira atu bele investe ba sira-nia an rasik mak vitál hodi halo fornesimentu hahán sustentavel sai karakterístika permanente ba setór agrikultura. Grupu rai-osan, bazeia ba solidaridade komunitária nu’udar sentimentu koñesidu didi’ak iha suku no aldeia sira iha Oé-Cusse laran, hahú atu sai fonte osan ba investimentu. Ezemplu ida mak iha Nibin, ne’ebé iha la’ós de’it fundu osan komunál liu US $45,000 maibé mós, hanesan ho maioria hosi grupu hirak hanesan ne’e, fornese hahán ba eskola sira. Fundus hirak ne’e hasa’e nivel rendimentu no sirkula osan iha área rurál sira-nia laran – osan dolár rihun atus lima sei iha sirkulasaun daudauk ne’e iha área rurál sira tanba grupu hirak ne’e – ne’ebé fó dalan ba família sira-nia rendimentu báziku atu sa’e ho maneira konfiavel.

Agrikultura

Rai ba agrikultura ladún barak iha Oé-Cusse. Mesak estimativa ektare 18,200 hosi rejiaun Oé-Cusse mak di’ak ba agrikultura. Rai ne’e mós fahe ba área ki’ik no fatin-agrikultura sira mak relativamente izoladu. Maioria hosi rai nu’udar fatin ki’ik sira iha família individuál sira-nia liman, no bazeia ba sistema titularidade kompleksu no inter-vinkulativu iha sira-nia komunidade nia liman. Ohin-loron maioria hosi agrikultura iha objetivu subsisténsia envezde objetivu komersiál. Produtu agrikultura prinsipál mak ai-fuan, modo, hare, ai-farina no batar. Serbisu agrikultura mak halo uza métodu no ekipamentu báziku sira hanesan lere no sunu. Traballu fíziku todan mak fundasaun ba fornesimentu hahán iha Oé-Cusse. Produsaun modo ektare ida-de’it – tradisionalmente halo hela liuhosi feto sira – presiza karik serbisu ema ida nian ba loron 364, no atu hadi’ak natar ektare ida presiza karik serbisu ema ida loron 244.

Hodi hatán ba inseguransa hahán nian, ZEESM TL hahú atu hadi’ak irigasaun, liuliu besik Mota Tono, ne’ebé nu’udar mota boot liu hotu iha Oé-Cusse nia rai-klaran. Maske Oé-Cusse mak koñesidu tanba nia bee barak, durante bailoron udan bele tun to’o milímetru ida-de’it nune’e to’os no natar na’in sira la besik ba irigasaun ka mota sira bele hasoru limitasaun tanba falta asesu ba bee. Ho asesu ba bee beibeik iha kanál sira bele hasa’e seguransa hahán. Asesu ba bee mós hamenus serbisu ne’ebé presiza loron-loron tanba to’os-na’in ida bele han oras 4 iha loron ida hodi kuru no lalin bee ba nia umakain, balada no to’os.

Iha ona planu ba jestaun agrikultura integradu ne’ebé enfazia estratéjia atu hakiak modo tipu balu iha fatin ida-de’it hamutuk ho ikan no ai-fuan sira. Variedade no tipu produtu agríkola foun ne’ebé iha konteúdu nutrisionál aas mak promove tiha ona, hanesan fore-rai. Tradisionalmente feto sira iha responsabilidade atu buka ai-han iha tempu hamlaha no melloramentu iha área ida-ne’e sei hamosu efeitu pozitivu seluk hodi hasa’e igualdade jéneru ekonómiku.

Medida hirak ne’e hasa’e ona produsaun nutrisionál hosi to’os ida-ida. Sentru iha suku Naimeco, porezemplu, manán prémiu hosi Programa Nasoens Unidas nia ba Dezenvolvimentu (PNUD) ba nia serbisu durante akampamentu empreza sosiál ne’ebé hala’o tiha iha Dili iha tinan 2016.

Sekretáriu iha Departamentu Agrikultura no Dezenvolvimentu Rurál, Regio da Cruz Salu, serbisu liuhosi sentru ortikultura 23 ne’ebé prodús modo, hasa’e diversidade no harii kolan-ikan sira. Iha esforsu ativu atu promove métodu orgániku sira. Kímiku sira-ne’ebé disponivel iha merkadu mak la apropriadu ba ambiente iha Oé-Cusse no halo aat ba rai, hamenus nia buras. Ai-han ne’ebé prodús liuhosi métodu orgániku iha nutriente barak liután, produsaun vitál ba rejiaun ida ho rai limitadu ba to’os no natar.

Peskas

Ema balu hosi populasaun Oé-Cusse labele han ikan tanba lulik, no peskas hela hanesan rekursu ida ladauk dezenvolve ne’ebé ZEESM TL sei buka atu haboot. Montante no tipu ikan fuik ne’ebé disponivel sei depende ba tempu iha tinan nia laran. Iha fatin ne’ebé bele, ikan sira mak integradu iha to’os no natar sira, iha bee-midar, iha kolan-ikan ne’ebé harii hodi hakiak ikan ne’e.

Floresta

ZEESM TL rekoñese katak molok atu hahú silvikultura komersiál, área ai-laran sira tenke hadi’a tiha uluk. Maske fatin bele hela iha kondisaun orijinál, bainhira kompara ho informasaun istóriku kona-ba Oé-Cusse, iha ai-laran barak ne’ebé lakon tiha ona. Nune’e sai vitál katak serbisu ne’e mak halo ho maneira ne’ebé sei hasa’e to’os no natar na’in sira-nia kapasidade atu buka moris ba sira-nia família no la’ós halo simplesmente atu buka osan. Tanba ida-ne’e, iha enfaze atu hadi’ak métodu agrikultura sira hodi muda hosi métodu lere no sunu ba métodu sira ne’ebé hasa’e produsaun hosi kada ektare. Ida-ne’e bele halo hela liuhosi hasa’e produsaun ho konteúdu nutrisionál aas. Iha liman seluk, fiar kulturál maka’as kona-ba nesesidade atu husik rai balu sei uza atu harii fundasaun ba área rezerva florestál. Ai-oan rihun ba rihun ba kuda fali ona, no área ida mak rezerva atu sai parke ba futuru. Atu lee liután kona-ba parke ne’e, favór bele lee kona-ba ami nia serbisu ne’e iha seksaun ambientál.

Pekuária

Atividade pekuária iha rejiaun prinsipalmente hakiak bibi, bibi-malae, manu, karau-baka, karau-timur no fahe sira. Maioria hosi animál sira la’ós estritamente komersiál maibé sei uza hanesan konta poupansa ba umakain no atu han rasik, atu fa’an bainhira presiza, ka atu oho tuir lisan. Molok atu bele konsidera esportasaun, tenke kumpre tuir padraun internasionál sira no atu tulun ida-ne’e vasinasaun padraun sira mak fornese tiha ona ba animál sira. Medida ida-ne’e sei hadi’a kualidade animál sira iha kurtu-prazu maibé mós harii hela fundasaun sira ba indústria esportasaun iha futuru.

Estrutura Departamentu Agrikultura nian

Iha seksaun lima ne’ebé serbisu iha Sekretáriu Agrikultura nia okos: Peskas, Pekuária, Floresta, Estensaun no Agrikultura Bázika Família nian. Estensaun ne’e mak oinsá ministériu haruka nia matenek-na’in sira ba terrenu atu fó konsellu, bainhira traballadór agrikultura bázika família sira tulun grupu komunidade sira ho melloramentu báziku sira hanesan tratór atu ke’e rai, selesaun fini, nst.

Se Ita-boot hakarak kontakta ami ka iha ideia ruma atu hato’o mai ami, favór haree ami-nia pájina kontaktu.