Ambiente

Ambiente

Ema Oé-Cusse sira iha ligasaun kulturál kle’an ho sira-nia rai no ZEESM TL halenok hela ida-ne’e hodi hametin katak protesaun ambientál mak hatama metin iha nia planu ba dezenvolvimentu ekonómiku

Rezerva Florestál

Esforsu sira atu fó dalan ba área ai-laran sira-nia rekuperasaun no kresimentu hela esensiál se karik ai-laran sira iha Oé-Cusse mak atu moris ho di’ak. Iha kada suku iha guarda floresta ne’ebé serbisu hela daudaun hodi hametin protesaun ba ai-oan no tuan sira. Área seluk mós tau ba sorin nu’udar rezerva natureza ba abanbainrua. Iha serbisu ho komunidade sira iha Leobatan, área ida-ne’ebé iha signifikasaun kulturál boot, maske husik kle’ur iha kondisaun aat, mak hili ba restaurasaun ambientál. Komunidade fó tulun atu harii lutu, marka área sira ba silvikultura hodi hale’u rezerva ne’e, no fó formasaun ba malu kona-ba ortikultura hodi hasa’e produsaun nutrisionál hosi área agrikultura atuál sira. Ita-boot bele lee liután iha ami-nia seksaun agrikultura kona-ba métodu hirak-ne’e.

Métodu Orgániku sira

Iha enkorajamentu ativu ba métodu agrikultura orgániku. Kímiku sira ne’ebé disponivel iha merkadu lokál mak la apropriadu ba ambiente iha Oé-Cusse no halo aat ba nia rai, no hamenus nia fertilidade. Aplikasaun adubu karau nian no materiál seluk tan ne’ebé disponivel laiha folin mak sustentavel no efisiente liután. Ai-han ne’ebé prodús hosi métodu hirak-ne’e mak iha nutriente barak liután, no hamosu rezultadu vitál ba rejiaun ida-ne’ebé iha rai limitadu. Ita-boot bele lee liután iha ami-nia seksaun kona-ba agrikultura.

Rekarrega Bee iha Rai-okos

Durante tinan maran sira iha períodu El Niño iha siklu meteorolójiku nivel bee nian iha rai-okos tun. Nune’e sai importante atu proteje prosesu atu hanakonu fali bee iha rai-okos ne’e durante tinan rai-udan maka’as atu prezerva fornesimentu ba tinan maran. Fluksu bee nian hosi foho ba tasi-sorin, taxa rekarrega bee iha rai-okos no jestaun bee nian simu konsiderasaun boot bainhira elabora planu ba drenajen Pante-Makassar.

Protesaun ba Animál sira

Tuir tradisaun lokál sira iha sempre tempu durante tinan nia laran bainhira atividade kasa mak bandu iha Oé-Cusse. Prinsípiu ida-ne’e sai parte ba lei nasionál iha Timor-Leste no ZEESM TL enkoraja nia komprensaun iha área horik-fatin importante sira-nia laran. Área ida hanesan ne’e mak ai-laran besik ba Citrana, área ida zoneadu ba turizmu amigavel ba ambiente. Área ne’e mak fatin ai-laran trópiku tasi-sorin nian ida boot liu hotu iha rejiaun nia laran. Tanba esforsu hosi katuas lia-na’in no ambientalista sira, atividade kasa animál mak hamenus tiha ona.

Protesaun ba Ahu-Ruin

Planu sira ba dezenvolvimentu urbanu mak dezeñadu atu asegura katak meti-ulun ahu-ruin sira besik tasi-sorin iha área urbanizadu maka’as hetan protesaun hasoru bee-udan ne’ebé suli sai hosi rai-leten. Ita bele haree meti-ulun ahu-ruin métru balu de’it hosi tasi-ibun hosi estrada prinsipál iha Pante-Makassar.

Materiál sira

Iha fatin hotu-hotu ne’ebé bele, materiál renovavel lokál sira mak utiliza, porezemplu, fatuk hosi Mota Tono mak harahun ba medida oioin atu harii estrada sira. Tanba ida-ne’e mak atividade ekonómiku tradisionál, utilizasaun materiál lokál hirak-ne’e sei mós hasai hela empregu lokál.

Planeamentu

Hanesan parte ida iha prosesu planeamentu fatin esensiál iha ambiente hetan prezervasaun. Ai tuan, área sagradu no fatin beleza sira mak evita ka integrada ba estrutura foun sira bainhira de’it bele. Porezemplu, iha ospitál nia oin fileira ai tuan sira mak integradu ba dezeñu estrada no entrada ospitál nian. Dezeñu ida-ne’e mak kria ona área mahon iha entrada ospitál nian ba família sira atu hein.

ZEESM TL mós hili ospedajen website nian atu nune’e website ida-ne’e laiha kustu ba natureza.