Turizmu

Turizmu

ZEESM TL halo foku atu promove no fornese infraestrutura ba turizmu bazeia iha komunidade. Nia tenke adekuadu ba área rurál sira no foka ba oinsá atu fó dalan ba interasaun indivíduu, no diretu entre ita-nia bainaka sira no povu Oé-Cusse.

Sekretariadu Rejionál ba Turizmu identifika ona pilár hirak tuirmai ne’e hanesan nesesáriu ba turizmu sustentavel: Polítika no Governasaun Turizmu nian, Komérsiu, Investimentu, Dadus no Kompetitividade, Empregu, Traballu Desente no Kapasitasaun, Redusaun Kiak no Inkluzaun Sosiál, no Sustentabilidade ba Ambiente Naturál no Kulturál.

Turizmu tenke jere no sai komunidade nian, ba komunidade, favorese ba prestadór servisu no fornesidór lokál sira. Nia tenke iha foku ba oinsá atu interpreta no komunika kultura no ambiente lokál. Iha apoiu maka’as ba setór turizmu privadu vibrante ne’ebé sa’e badadaun. Agora daudaun ZEESM TL sei lidera asaun iha área xave sira hanesan formasaun, literasia no infraestrutura. Enkuantu área hirak-ne’e sai di’ak liután, indústria privadu sei bele hasoru dezafiu boot liután.

Kriasaun ba tipu turizmu ne’e sei depende ba parte rua:

  • partisipasaun: katak rua-hotu envolvimentu, edukasaun no formasaun ba komunidade,
  • infraestrutura: katak fasilidade saúde, estrada no eletrisidade.

Dezafiu xave sira mak identifika ona hanesan:

  • Difikuldade atu la’o to’o Oé-Cusse no halo viajen iha laran
  • Falta infraestrutura hanesan eletrisidade no bee-moos ne’ebé asesivel
  • Falta formasaun no edukasaun ne’ebé nesesáriu ba setór ne’e hamutuk ho kustu aas
  • Auzénsia hosi atrasaun sira-ne’ebé asesivel

Atu kria bloku fundasaun báziku hirak-ne’e no atu ultrapassa dezafiu hirak-ne’e, ZEESM TL loke ona sentru enerjia elétrika no aeroportu ne’ebé oferese asesu loron-loron bá-mai Oé-Cusse, fasilidade ro-pasajeiru nian mak hadi’ak ona, impedimentu ofisiál hodi hetan asesu ba Oé-Cusse mak negoseia fali ona ho Indonézia, no rede viaturas mak hadi’ak tiha ona. Rede eletrisidade mak haluan, restaurante privadu no kafé sira mak enkoraja tiha no área tasi-ibun no sira-seluk tan mak hamoos hela beibeik.

 

Nu’udar lideransa ba esforsu diretu atu liga komunidade sira ho turista sira, Sekretáriu Rejionál ba Turizmu Komunitáriu, Inácia da Conceição Teixeira, hahú ona sorumutu ho komunidade sira ne’ebé nota ba sira-nia produsaun lembransa no sasán artezanatu sira hanesan olaria no tais iha Fonte Sagrada & Oesilo, ho planu sira atu hala’o prosesu iha área izoladu sira-seluk iha Oé-Cusse laran. Levantamentu ida-tan atu haree ba posibilidade atu kria pakote sasán ba turista sira uza lembransa hirak-ne’e no viajen ba fatin kapás mós esplora hela daudaun ne’e.

Karik Ita-boot iha ideia ka servisu ida-ne’ebé Ita sente bele hadi’ak setór foun ne’e ba ekonomia Oé-Cusse, favór kontakta ami.